活在當下

工作壓力真係迫到我精神緊張..一日24小時都唔夠做呢堆工作..日復日..每日放工後都諗仲有邊d野未做..真係做到人癲癲地..好想大喊..

放假本應係開心既事..但自從出黎做野之後..我就好討厭假期..真係莫名地討厭..因為工作就好像暴風雨既前夕同翌日..前後各一星期..會係忙死左..

7月1號回歸日放假..應該好開心..所以6月30號..9點放工後..好開心同好友Q小姐特約..呢個慢長既特約..足足特左6個鐘..3個鐘行街+3個鐘係cafe坐..

係cafe坐個3個鐘..真係覺得前所未有既舒服..灘左係sofa到睇新鮮剛剛買到手既船版雜誌..其實都好貴..如果唔係V6封面..我真係唔買..

凌晨3點鐘..真係支持唔住..特約提早結束..原本諗住去到第二朝早飲早茶..但我捱唔住..搭通宵巴士返屋企..半個鐘返到..

第一時間竟然唔係沖涼+洗頭..而係開電腦..真係short左..最終係5點前沖完涼洗完頭..身體已經發出得返5% energy既警告..

但最終都係要睇完所有新聞6點半先上床休息..呢個時候身體已經冇晒energy..只係用緊d備用意志力支撐住..

以為有覺好訓..點知公司大陸工廠既同事朝早9點就打黎不停問東問西..攪掂左以為又可以繼續訓..但點知個運輸司機打黎..

話有車貨交倉之後有麻煩..咩都做唔到..check完貨..倉庫工人搬走左貨..但唔簽單..又唔俾拎走...呆左成個鐘..

最終我都係10點鐘起左身..又開始我既工作..一直到3點..真係從未試過咁辛苦..咁大壓力..之後我竟然走去午睡1小時..

10歲以後我真係未試過午睡..因為我覺得午睡係一種非常浪費時間既行為..竟然...我竟然午睡..我只係覺得好出奇...我竟然覺得浪費時間係咁美好..

終於捱到星期六..呢一日放工後同同事去飲茶..其實都係講是講非..高層經理不停係到講是非.....唉!~~~搵食真係艱難..

跟住落黎既活動就係我期待左一個星期既自由時間..出左旺角行行行..一個人..漫無目的既行..其實真係好舒服..

我竟然放慢腳步行街..終於發覺原來平時既自己係咁癲..好想暫停我一直非常非常急既腳步..其實我係好怕身邊所有事物都變得龜速..

身邊既朋友都好唔鍾意同我行街..因為我行既速度..佢係要跑黎配合..呢日既我竟然用我好怕既龜速配合身邊既人..

原來龜速..其實係正常人既速度..睇到好多..平時我一直無留意..無發現既事物..今次我竟然搵到一間樓上書店買左同訂左我一直好想好想買台灣出版既書..

買左阿信既 happy birth day 同 浪漫的逃亡..訂左energy既另類人生..信樂團既信搖滾得永生..同埋一本特別既東京鐵塔..

全部都係我錯過左..但自己又好想買既書..一直好努力用最快既速度係香港不同地區不同書店搵以上既書..但一直都無收穫..竟然今日係無意中..

搵到一間小小書店..裡面仲要有我一直好想好想買既書..最可笑既係..我每星期出旺角原來都有經過呢間書店..

只係平時飛快既腳步..令我錯過左好多我想搵而又一直係我身邊出現既野..

夜晚同家姐&她的"亨利"會合..一齊去酒店食自助餐..其實係慶祝家姐既男朋友既媽咪生日..環境一流..食物都非常之好..

新鮮海鮮真係"賣飛弗"...甜品就更加"地里蛇"...

非常滿足+非常豐富既星期六..真係我一星期最期待既一日..

星期日好好留係屋企..沉澱冷靜..

星期一又開始永無止境既忙碌..